Første byggetrinn i vidare utvikling av kulturminneparken er delprosjekt 1: eit visningshus og eit bygg med offentlege toalett. Visningshuset skal fungere som inngangsport til anlegget, og gje rom for utstillingar, informasjon, undervisning og publikumsaktivitetar før langhuset står ferdig.
Visningshuset er ein mindre kopi av langhuset, utforma og bygd av Knut Fjellestad. Bygget står i dag på nabotomta og vert nytta som utebod. Fjellestad har signalisert at han ønskjer å donere bygget til stiftinga, føresett at det vert sett opp eit nytt lagerbygg til erstatning på eigedomen hans. Det gjev prosjektet ei unik moglegheit til å etablere eit autentisk formidlingsbygg på ein kostnadseffektiv måte.
Toaletta tek utgangspunkt i modular av typen «Friluftsboks», ei standardisert sanitærløysing som Gloppen kommune har kjøpt inn til friluftsområde og besøksmål. Tre modular vert samla i eitt anlegg, kledde inn med treverk og gitt eit felles tak. Gjennom kommunen si ordning mottek prosjektet eit tilskot på kr 110 000 per modul til etableringskostnader.
Samstundes vil stiftinga med eigne midlar opparbeide eit lite skogsområde tilrettelagt for aktivitet for barn og unge, med bålplass og sittebenkar av skiferstein.
Samla kostnadsramme for delprosjekt 1 er kr 1 690 703. Igangsetjing føreset fullfinansiering. Nødvendige løyve og formelle avklaringar er under arbeid, og stiftinga held løpande dialog med aktuelle myndigheiter om byggeløyve, dispensasjonar og tilknyting til vatn og avløp.